東岸榜首肉搏戰 溜馬火爆W

周三嘅NBA常規賽上演東岸榜首大戰，1哥溜馬主場對老2熱火，戲碼咁強勁，識睇嘅，一定睇呢場波。兩邊球員成場都好有火，打到好似拍緊動作片多過籃球比賽咁。最終溜馬以84:83、1分之微險勝，今季對賽以2:1領先，話畀全世界知邊隊先係大佬。


大帝見紅批踭報復
坊間一致認定東岸決賽會係溜馬對熱火，未知之數只係究竟邊隊會喺常規賽做到岸區1哥，入到決賽可以攞到關鍵嘅主場之利。高手過招，雙方梗係打甩髀。大帝占士開波冇耐就發生小意外，俾球證搞到佢趴低，為嚟緊成場比賽緊張刺激嘅動作場面揭開序幕。全場精華集中喺第4節，首先有不嬲出手封阻震懾全場嘅大帝竟然失威，俾保羅佐治（PG）一吓插花壓過喺面前入樽；唔夠半分鐘，自己上籃仲要俾防守嘅史高拉一掌拍正塊面，搞到右邊鼻窿要塞住止血（小圖），顏面盡失。
大帝火起，過咗冇幾耐再次上籃，今次面對住希拔，大帝乘機抽水批踭，令到呢位昂藏7呎2、接近300磅嘅高佬倒地不起，更加一度失憶，不過佢夠硬淨，入去更衣室檢查一下傷勢之後，換件乾淨波衫就再落場搏殺。至於大帝當然唔可以逍遙法外，被吹一記惡意犯規。

[img]http://static.apple.nextmedia.com/images/apple-photos/apple/20140328/large/28s8-904p.jpg[/img]

L史堤軒臣「儍仔」被逐
溜馬嘅L史堤軒臣亦受緊張氣氛感染，俾人撞低都成功入波，起番身之後意氣風發，睥住獲迪，又唸唸有詞咁。百思不得其解嘅獲迪就即刻望住L史堤軒臣嘅背影，笑而不語，疑似暗笑對方儍仔，但一秒後極速變臉交戲，攤大雙手，作無奈狀，引導球證吹對手技犯；結果L史堤軒臣就硬食今場第2個T，被趕出場。其實今場波兩位真係好有緣，佢哋喺第3節已經有牙齒印，齊齊被判技犯。L史堤軒臣要提早離場，只能夠怪自己道行不及獲迪喇；佢賽後亦知衰，向隊友道歉。
成場火花四起，兩邊嘅分數一路都咬得好緊，最尾大帝又唔起手，交個波畀保殊絕殺，但竟然「大針」，注定熱火輸波。贏波嘅PG賽後接受訪問難掩興奮之情，仲向大家保證，季後賽場場都會好似呢場咁精采，各位球迷有福喇。



[img]http://static.apple.nextmedia.com/images/apple-photos/apple/20140328/large/1395935419_b981.jpg[/img]
■占士（上圖右）上籃時向希拔（上圖左）批踭，後者狀甚痛苦，更一度失憶。

[img]http://static.apple.nextmedia.com/images/apple-photos/apple/20140328/large/aa0801a.gif[/img]

來源:蘋果日報網站